Ўзбекистон ва Исроил Савдо-саноат палаталари раҳбарлари ўзаро манфаатли ҳамкорликни кенгайтириш масалаларини муҳокама қилдилар

Ўзбекистон элчихонаси кўмагида Ўзбекистон савдо-саноат палатаси раиси Даврон Вахобов ва  Исроил савдо-саноат палаталари федерацияси (ССПФ) раиси Уриэль Линн  ўртасида онлайн учрашув ташкил этилди, деб  хабар бермоқда  «Дунё» АА мухбири. 

Учрашувда, шунингдек, Ўзбекистон элчиси Феруза Махмудова ҳам  иштирок  этди.

Мулоқот давомида ўзаро ҳамкорликни янада чуқурлаштириш, икки мамлакат ишбилармон доира вакиллари ўртасидаги алоқаларни жадаллаштириш, қишлоқ хўжалиги, электротехника,  текстиль ва фармацевтика соҳаларида қўшма лойиҳаларини ишлаб чиқиш масалалари муҳокама қилинди.

Бўлиб ўтган  музокаралар натижасида Ўзбекистон ва Исроил савдо-саноат палаталарининг ҳамкорликни ривожлантиришга йўналтирилган  тадбирлар режасини, шунингдек, қишлоқ хўжалиги, электротехника,  текстиль, фармацевтика соҳаларида инвестициявий лойиҳаларини ишлаб чиқиш ва  ўзбек миллий  маҳсулотлари экспорти ҳажмини ошириш бўйича келишувларга эришилди.

Исроил ССПФ 1919 йилда нотижорат ташкилот сифатида ташкил этилган. Федерация 6 та минтақавий савдо палаталаридан иборат бўлиб, 5 мингдан ортиқ корхона ва компанияларга турли хизматларни кўрсатади. Ташкилотга аъзо корхоналарнинг 95 фоизини кичик ва 5 фоизини ўрта  бизнес субъектлари ташкил қилади.

Ўзбекистон ва Исроил Савдо-саноат палаталари ўртасида 2013 йилда  Ҳамкорлик меморандуми имзоланган.