Ўзбекистон ва Исроил электроэнергетика соҳасидаги ҳамкорлик масалаларини муҳокама қилди

Ўзбекистон элчихонаси кўмагида  Ўзбекистон Энергетика вазирлиги ходимлари ва Исроилнинг Электрик компанияси (ИЭК) бош директорининг ўринбосарлари Ицхак Бальмас ва Тамар Феклер билан онлайн учрашувлар ташкил этилди, деб  хабар бермоқда «Дунё» АА мухбири. 

1923 йилда ташкил этилган  ИЭКнинг 99 фоиз улуши Исроил ҳукуматига тегишли. Ҳозирда Исроилнинг 75 фоиз электр энергияси ушбу  компания томонидан ишлаб чиқарилади.

Бўлиб ўтган мулоқот чоғида электр ишлаб чиқариш ва уни истеъмолчига етказиб беришга масъул тузилмалар ўртасида ҳамкорлик ўрнатиш, Исроилнинг илғор тажрибасини республикамизга жалб қилиш ҳамда ушбу мамлакатга экспорт номенклатурасини кенгайтириш масалалари муҳокама этилди.

Шунингдек, Исроил томонига  Ўзбекистон энергетика соҳасидаги  амалга оширилаётган ислоҳотлар ва лойиҳалар  ҳақида батафсил маълумот берилди ҳамда республика электротехника саноатини ривожлантиришга бағишланган тақдимот  ўтказилди.

 Музокаралар якунида Ўзбекистон ва Исроил энергетика вазирликлари ўртасида мулоқотларни ҳамда  икки мамлакат соҳа мутахассисларининг онлайн учрашувларини йўлга қуйиш, шунингдек, Ўзбекистон электротехника маҳсулотларини Исроил бозорига экспорт қилиш мақсадида республикамиз корхоналарининг тегишли  тендерларда қатнашишини таъминлаш масалалари тўғрисида келишиб олинди.