O‘zbekiston Yevropa muhim xomashyo alyansiga qo‘shildi

---

Dunyo kritik minerallar bo‘yicha yangi davrga kirib keldi, shubhasiz, O‘zbekiston ham bu jarayonlar markazida bo‘lishga intilmoqda.

O‘tgan yili mamlakatimiz Yevropa Ittifoqi bilan muhim xomashyo sohasida hamkorlik bo‘yicha kelishuv imzolagan edi. Endi esa yana bir katta qadam tashlandi — O‘zbekiston texnologik metallar kombinati (TMK) Yevropa muhim xomashyo alyansi (ERMA)ga rasman a’zo bo‘ldi. Bu bizning global bozordagi o‘rnimizni yanada mustahkamlaydi.

 

ERMA nima?

 

Yevropa muhim xomashyo alyansi (ERMA) Yevropa sanoatining resurs siyosatini belgilovchi eng muhim platformalardan biri. U Yevropa sanoati uchun litiy, volfram, molibden va nodir yer elementlarini xavfsiz va barqaror manbalardan yetkazib berishni ta'minlaydi. Mazkur alyans Yevropaning yashil texnologiyalar va kelajak energetikasiga o‘tish jarayonida hal qiluvchi kuchga ega.

 

Mamlakatimiz uchun ushbu alyansning ahamiyati qanday?

 

1. Yevropa Ittifoqi bilan institutsional muloqotni yanada mustahkamlash – ayniqsa, xomashyoni chuqur qayta ishlash, sifat standartlarini joriy etish va eksport imkoniyatlarini kengaytirish yo‘nalishlarida;
2. Investitsion jozibadorlikni oshirish – xalqaro sertifikatlashtirish jarayonlarini yo‘lga qo‘yish va Yevropa miqyosidagi yirik loyihalarga faol jalb etilish orqali;
3. O‘zbekistonning xomashyo diplomatiyasini rivojlantirish – mamlakatni ishonchli va strategik hamkor sifatida xalqaro miqyosda tan olinishiga hissa qo‘shish;
4. Yevropaning texnologik va ilmiy klasterlari bilan hamkorlikni kengaytirish – xususan Germaniya, Fransiya, Finlyandiya va Avstriyada joylashgan ilg‘or markazlar bilan qo‘shma tashabbuslarni amalga oshirish orqali.

 

Shuningdek, ushbu a'zolik TMKni kritik minerallar bozorida butunlay yangi darajaga olib chiqishi kutilmoqda. Xususan, Yevropa grantlari va investitsiyalari orqali bu yo'nalishdagi loyihalar uchun moliyaviy mexanizmlar kengayadi. Yevropaning ilg‘or markazlari bilan qo‘shma tadqiqotlar olib boriladi va innovatsiyalar tatbiq etiladi. TMK mahsulotlari xalqaro bozorga yanada yuqori sifat ko‘rsatkichlari bilan chiqadi.

 

ERMA direktori Massimo Gasparon ham hamkorlikdan umidli ekanini aytib, “Biz ERMA maqsadlarini amalga oshirish, shuningdek, Yevropa Ittifoqi va O‘zbekiston o‘rtasidagi hamkorlikni mustahkamlash yo‘lida TMK bilan birgalikda ishlashni intiqlik bilan kutmoqdamiz”, - dedi.

Bir so‘z bilan aytganda, bu a’zolik O‘zbekistonni oddiy xomashyo yetkazib beruvchidan innovatsion hamkor darajasiga ko‘taradi.

Ўзбекистон геосиёсий майдонда яна бир муҳим “чипта”га  эга бўлди

 

Ўзбекистон муҳим фойдали қазилмалар соҳасида халқаро майдонда ўз мавқеини жадал мустаҳкамламоқда. Соҳанинг етакчи корхонаси – “Ўзбекистон технологик металлар заводи” (ТМК) мамлакатимизни жаҳон ҳамкорлигининг асосий марказларидан бирига айлантирмоқда.

ТМКнинг Канадада жойлашган Критик минераллар институтига (КМИ) расмий кириши муҳим қадамлардан бири бўлди.

КМИ саноат корпорациялари, давлат идоралари, тадқиқот марказлари ва инвесторларни бирлаштирган глобал миқёсдаги интеллектуал ва стратегик марказдир. Бу ерда “келажакнинг ресурс харитаси” шакллантирилмоқда. Бу йил КМИ томонидан эълон қилинган 23 та муҳим минераллар рўйхати аллақачон кўплаб мамлакатларда технологик ривожланиш ва саноат сиёсати учун эталонга айланди.

“Биз ТМК учун Канада ва АҚШнинг етакчи компаниялари билан ҳамкорлик алоқаларини ўрнатишда кўприк бўла оламиз. Шимолий Америка компаниялари ҳам Ўзбекистондек ишончли ҳамкорга муҳтож”, – деди КМИ бош директори Трейси Хьюз.

КМИга аъзолик Ўзбекистон учун қўйидаги афзалликларни тақдим этади:

- АҚШ, Канада, Австралия, Европа ва Осиёнинг ресурс стратегиялари бўйича тезкор ва ишончли маълумотларни олиш;

- Ўзбекистонда қазиб олинган нодир элементларни халқаро етказиб бериш занжирларига киритиш;

- технологиялар трансфери ва инвестицияларни жалб қилиш платформаларига кириш;

- бозор тебранишлари, сиёсий қарорлар ва технологик инновациялар таҳлили билан ҳафталик “Муҳим минераллар ҳисоботи” ни олиш.

Ушбу қадам туфайли ТМК нафақат Ўзбекистон манфаатларини жаҳон бозорида фаолроқ илгари суриш, балки минтақавий барқарорлик ва глобал таъминот хавфсизлиги масалалари бўйича позицияларни ишлаб чиқишда иштирок этиши мумкин бўлади.